క్యాథలిక్ రెడ్డి అసోసియేషన్ ఫాతిమా నగర్ ఆధ్వర్యంలో ఎస్బిఐ కాలనీలోని కిండర్ ల్యాండ్ పాఠశాల ఆవరణలో మినీ క్రిస్మస్ వేడుకలు ఘనంగా నిర్వహించారు. పండుగ వాతావరణంతో కళకళలాడిన ఈ కార్యక్రమానికి పెద్ద సంఖ్యలో స్థానికులు, అసోసియేషన్ సభ్యులు హాజరయ్యారు. క్రిస్మస్ శోభను ప్రతిబింబించే అలంకరణలు, ప్రార్థనలు, సాంస్కృతిక కార్యక్రమాలు వేడుకలకు ప్రత్యేక ఆకర్షణగా నిలిచాయి.
ఈ కార్యక్రమానికి వరంగల్ పశ్చిమ ఎమ్మెల్యే నాయిని రాజేందర్ రెడ్డి ముఖ్య అతిథిగా హాజరయ్యారు. ఆయన మాట్లాడుతూ క్రిస్మస్ పర్వదినం ప్రేమ, సోదరభావం, శాంతి అనే విలువలను సమాజానికి గుర్తు చేసే గొప్ప పండుగ అని అన్నారు. మానవత్వం, సేవాభావంతో ముందుకు సాగాలని ఈ పండుగ ప్రతి ఒక్కరికి సందేశం ఇస్తుందన్నారు.
అన్ని వర్గాల ప్రజలు ఐక్యతతో, పరస్పర గౌరవంతో జీవించాలన్నదే క్రిస్మస్ పండుగ సారాంశమని ఎమ్మెల్యే పేర్కొన్నారు. మతాలకు అతీతంగా ప్రతి పండుగ సమాజాన్ని మరింత దగ్గర చేస్తుందని, ఇటువంటి కార్యక్రమాలు సామాజిక ఐక్యతను బలోపేతం చేస్తాయని తెలిపారు.
ఈ కార్యక్రమంలో డివిజన్ అధ్యక్షుడు పున్నం, క్యాథలిక్ రెడ్డి అసోసియేషన్ అధ్యక్షులు మథ్యస్ రెడ్డి, కార్యదర్శి ఇన్నా రెడ్డి, అసోసియేషన్ ప్రతినిధులు మేరీ, సుమ, ఎం.ఎస్. రెడ్డి తదితరులు పాల్గొన్నారు. వేడుకల ముగింపులో క్రిస్మస్ శుభాకాంక్షలు తెలియజేస్తూ, అందరికీ మిఠాయిలు పంపిణీ చేశారు.
