ప్రజాశాంతి పార్టీ అధ్యక్షుడు కేఏ పాల్ శనివారం ఎక్స్ (ట్విట్టర్) వేదికగా కాంగ్రెస్ అగ్రనేత రాహుల్ గాంధీ ప్రయాణంపై తీవ్ర ఆరోపణలు చేశారు. మెస్సీని కలవడానికి రాహుల్ గాంధీ ఖరీదైన ప్రైవేట్ విమానంలో ప్రయాణించారని, ఆ ప్రయాణానికి సంబంధించిన ఖర్చులపై అనుమానాలు ఉన్నాయని ఆయన తన ట్వీట్లో పేర్కొన్నారు. ఈ ప్రయాణం వెనుక ఉన్న ఆర్థిక లావాదేవీలను ప్రజలకు స్పష్టంగా తెలియజేయాలని డిమాండ్ చేశారు.
అదేవిధంగా తెలంగాణ ముఖ్యమంత్రి రేవంత్ రెడ్డిపై కూడా కేఏ పాల్ తీవ్ర వ్యాఖ్యలు చేశారు. హైదరాబాద్లో ఇటీవల నిర్వహించిన సమ్మిట్ సందర్భంగా వేల కోట్ల రూపాయల నగదు వసూలు చేశారనే ఆరోపణలు బీజేపీ, బీఆర్ఎస్ నేతలు చేస్తున్నారని ఆయన ప్రస్తావించారు. ఆ నగదులో భాగాన్ని రాహుల్ గాంధీకి అందించేందుకే ఈ ప్రైవేట్ విమాన ప్రయాణమా? అనే అనుమానాలను కేఏ పాల్ లేవనెత్తారు. ఈ అంశంపై పూర్తిస్థాయి వివరణ ఇవ్వాలని కోరారు.
కాంగ్రెస్ పార్టీ కోసం వ్యాపార వర్గాల నుంచి భారీగా ‘వైట్ మనీ’ సేకరిస్తున్నారని కూడా కేఏ పాల్ ఆరోపించారు. డిసెంబర్ 8, 9 తేదీల్లో హైదరాబాద్లో జరిగిన సమ్మిట్కు హాజరైన వారినుంచి ఎంత మొత్తం వసూలు చేశారో వెల్లడించాలని డిమాండ్ చేశారు. ప్రజలకు సమాధానం చెప్పాల్సిన బాధ్యత ప్రభుత్వంపై, కాంగ్రెస్ పార్టీపై ఉందని ఆయన అన్నారు.
రాహుల్ గాంధీ ఢిల్లీకి తిరిగి వెళ్లే విమాన ప్రయాణాన్ని సీబీఐ, ఈడీ వంటి కేంద్ర దర్యాప్తు సంస్థలు పరిశీలించాలని కేఏ పాల్ కోరారు. ఇదిలా ఉండగా, ఉప్పల్ స్టేడియంలో నిర్వహించిన మెస్సీ ఫ్రెండ్లీ మ్యాచ్ను వీక్షించేందుకు కాంగ్రెస్ అగ్రనేత రాహుల్ గాంధీ హైదరాబాద్కు వచ్చిన విషయం తెలిసిందే. ఈ నేపథ్యంలో కేఏ పాల్ చేసిన వ్యాఖ్యలు రాజకీయ వర్గాల్లో తీవ్ర చర్చకు దారితీశాయి.
