వరుసగా మూడు సెంచరీలు కొట్టి ఫామ్లో ఉన్న ప్లేయర్ను ఎవరు వదులుకుంటారు? దేశవాళీ క్రికెట్లోనూ రాణిస్తూ, ప్రతి అవకాశం దక్కించుకునేలా ఆడుతున్న సంజూ శాంసన్ వంటి ఆటగాడు టీమిండియాలో రెగ్యులర్గా ఉండటం సహజమే. కానీ అతన్ని వరుసగా బెంచ్కే పరిమితం చేయడంతో అభిమానుల్లో అసహనం వెల్లువెత్తుతోంది. దక్షిణాఫ్రికాతో తొలి టీ20లో సంజూని కాదని జితేశ్ శర్మను తీసుకోవడం ఈ ఆగ్రహానికి కారణమైంది. ముఖ్యంగా టీ20ల్లో ఓపెనర్గా సంజూ అద్భుతంగా రాణిస్తున్న సమయంలో శుభ్మన్ గిల్ను అనూహ్యంగా తిరిగి టీ20లోకి తీసుకురావడం అభిమానులకు అర్ధం కాని నిర్ణయంగా మారింది.
మూడు ఫార్మాట్లకు ఒకే కెప్టెన్ ఉంచాలన్న ఆలోచనతో గిల్కు ప్రాధాన్యత ఇచ్చినప్పటికీ, దాని ఖర్చు సంజూపై పడిందనే అభిప్రాయం బలపడుతోంది. గిల్ వరుసగా విఫలమవుతున్నా, సంజూని సరైన స్థానంలో ఆడనివ్వడం లేదు. ఒకప్పుడు ఓపెనర్గా రాణించిన అతన్ని 6-8 స్థానాల్లో మార్చేస్తూ పంపడం అతని బ్యాటింగ్ శైలికి చెల్లని నిర్ణయమని విశ్లేషకులు కూడా అంటున్నారు. అయినా, తాను పొందిన ప్రతి అవకాశాన్ని మెరుగైన స్టైల్లో ఉపయోగించుకుంటూ సంజూ ఫైర్బ్రాండ్ మాదిరిగానే ఆడుతున్నాడు.
ఇలాంటి సమయంలో ఐపీఎల్లో మెరిసిన జితేశ్ శర్మ టీమిండియాలోకి ఎంట్రీ ఇవ్వడం అనేక చర్చలకు దారి తీసింది. సయ్యద్ ముస్తాక్ అలీ టోర్నీలో సంజూ నాలుగు అర్ధశతకాలు కొడితే, జితేశ్ ఒక్క హాఫ్ సెంచరీ కూడా చేయలేదు. కానీ జితేశ్ ఫినిషర్గా ఆడతాడన్న కారణంతో అతనికి ప్రాధాన్యత ఇవ్వడం అభిమానులకు నచ్చలేదు. ఓపెనర్గా తన బెస్ట్ను చూపగలమనే సంకేతాలు ఇస్తున్న సంజూని పూర్తిగా పక్కన పెట్టి జితేశ్కు అవకాశమివ్వడం టీం మేనేజ్మెంట్పై తీవ్రమైన విమర్శలకు కారణమైంది.
ప్రస్తుతం బాధ్యతలు చేపట్టిన హెడ్ కోచ్ గౌతం గంభీర్ నిర్ణయాలకు రాజకీయ రంగు పూసే ప్రయత్నం జరుగుతోంది. టాపార్డర్లో గిల్, సూర్యకు ప్రాధాన్యత ఇవ్వడానికి సంజూపై ఒత్తిడి తెస్తున్నారని అభిమానులు ఆరోపిస్తున్నారు. తిలక్ వర్మకు కూడా దాదాపు స్థానం ఖాయం చేసిన గంభీర్, సంజూ ఉన్నా కూడా అక్షర్, వాషింగ్టన్ లాంటి ఆల్రౌండర్లను ముందుగా పంపిన సందర్భాలు అభిమానుల్లో అనుమానాలు రేకెత్తిస్తున్నాయి. టీ20 వరల్డ్ కప్ ముందు రాజకీయాల కోసం జట్టును నాశనం చేయకూడదని నెటిజన్లు హెచ్చరిస్తున్నారు. ‘సారీ సంజూ… నీకు తగిన గౌరవం ఇవ్వడం లేదు’ అంటూ సోషల్ మీడియాలో పోస్టులు వెల్లువెత్తుతున్నాయి.
