మాడ్గుల మండలంలోని గ్రామపంచాయతీ ఎన్నికల నామినేషన్ ప్రక్రియను సులభతరం చేయడానికి అధికారులు విస్తృత ఏర్పాట్లు చేపట్టారు. మండల పరిధిలో ఉన్న 34 గ్రామపంచాయతీలకు సంబంధించి నామినేషన్ల స్వీకరణ కోసం మొత్తం 11 క్లస్టర్లు ఏర్పాటు చేసినట్లు ఎంపీడీవో విజయలక్ష్మి తెలిపారు. స్థానిక సంస్థల మూడో విడత నామినేషన్లు డిసెంబర్ 3 నుండి స్వీకరిస్తున్నట్లు ఆమె పేర్కొన్నారు.
డిసెంబర్ 17న మూడో విడత పోలింగ్ జరగనున్న నేపథ్యంలో, ప్రతి గ్రామానికి సులభంగా చేరుకునే విధంగా క్లస్టర్లను కేటాయించినట్లు అధికారులు తెలిపారు. మాడ్గుల, నల్లచెరువు, కాష గూడెం గ్రామాల నామినేషన్లు మాడ్గుల రైతు వేదికలో స్వీకరించగా, కోల్కుల పల్లి, నర్సయిపల్లి, గుడితండా గ్రామాలకు కోల్కుల పల్లి రైతు వేదికను కేటాయించారు.
నాగిళ్ళ, ఫిరోజ్ నగర్, కొట్రగాని తండా, కొర్రతండా గ్రామాలకు నాగిళ్ళ రైతు వేదికలో నామినేషన్ కేంద్రం ఏర్పాటు చేశారు. అప్పరెడ్డిపల్లి, జయరాం తండా, పకీరా తండాలకు అప్పరెడ్డిపల్లి గ్రామపంచాయతీ కేంద్రం కేటాయించబడింది. అవురుపల్లి, నల్లవారి పల్లి, దొడ్ల పహాడ్ గ్రామాలకు అవురుపల్లి గ్రామపంచాయతీలోనే నామినేషన్లు స్వీకరించనున్నారు.
కలకొండ, చంద్రాయనపల్లి, సండ్రల్ గడ్డ తండా గ్రామాలకు కలకొండ రైతు వేదికను కేటాయించగా, ఇర్విన్, రామ్ దుగ్యాల, గిరికొత్తపల్లి గ్రామాలకు ఇర్విన్ రైతు వేదికను ఏర్పాటు చేశారు. అదేవిధంగా, అర్కాపల్లి, పల్గు తండా, జరుపుల తండాలకు అర్కాపల్లి గ్రామపంచాయతీ కేంద్రలో, బ్రాహ్మణపల్లి, కొత్త బ్రాహ్మణపల్లి, అన్నే బోయినపల్లి గ్రామాలకు కొత్త బ్రాహ్మణపల్లి రైతు వేదికలో నామినేషన్లు స్వీకరిస్తారు. అంతంపేట, సుద్దపల్లి గ్రామాలకు అందుగుల రైతు వేదిక, కుభ్యతండ, నర్సంపల్లి, పల్లెతండ గ్రామాలకు కుభ్యతండ గ్రామపంచాయతీ నామినేషన్ కేంద్రంగా ఎంపీడీవో విజయలక్ష్మి ప్రకటించారు.
