ప్రభుత్వ నియమ నిబంధనలను పట్టించుకోకుండా రైతుల నుంచి సేకరించిన భారీ పరిమాణంలో ధాన్యాన్ని కామాక్షి రైస్ మిల్ పెండింగ్లో పెట్టినట్లుగా బయటపడుతోంది. ప్రభుత్వానికి ఇవ్వాల్సిన సివిల్ సప్లై బియ్యాన్ని ఇప్పటివరకు ఒక్క క్వింటాల్ కూడా అందించకపోవడం స్థానికంగా తీవ్ర చర్చనీయాంశమైంది. ప్రభుత్వం నిర్ణయించిన విధానాలకు విరుద్ధంగా వ్యవహరించిన ఈ మిల్ నిర్వాహకులు, మొత్తం 2900 టన్నుల ధాన్యాన్ని పక్కదారి పట్టించినట్లు ఆరోపణలు వెల్లువెత్తుతున్నాయి. నాణ్యమైన బియ్యాన్ని బయట మార్కెట్లో విక్రయించి లాభాలు పొందుతున్నారని రైతులు మరియు స్థానికులు తీవ్ర ఆందోళన వ్యక్తం చేస్తున్నారు.
ఇటీవల జిల్లా విజిలెన్స్ అధికారులు దొంతి గ్రామ శివారులో ఉన్న కామాక్షి రైస్ మిల్ను నామమాత్రంగా తనిఖీ చేసినట్లు తెలిసింది. అయితే ఆ తనిఖీల తర్వాత కూడా మిల్ ఇప్పటివరకు ప్రభుత్వానికి రా రైస్ అందించకపోవడం అనుమానాలను మరింతగా పెంచింది. ఈ వ్యవహారంపై డిప్యూటీ తహసీల్దార్ షఫీ యొద్దీన్ను సంప్రదించగా, మాకు ఈ అంశంతో ఎలాంటి సంబంధం లేదని స్పష్టం చేశారు. అధికారుల మధ్య సమన్వయం లేకపోవడం కూడా ఈ వివాదం మరింత సంక్లిష్టంగా మారడానికి కారణమవుతోంది.
జిల్లా సివిల్ సప్లై మేనేజర్ జగదీశ్వర్ను వివరణ కోరగా, 2900 టన్నుల ధాన్యం పెండింగ్లో ఉందన్న విషయం వాస్తవమేనని ఆయన అంగీకరించారు. త్వరలోనే పూర్తి స్థాయి తనిఖీలు చేపట్టి ధాన్యం నిల్వల్లో ఎలాంటి తేడాలు ఉన్నా కఠిన చర్యలు తీసుకుంటామని తెలిపారు. ప్రభుత్వానికి బాకీ ఉన్న నిల్వలను ఖరీఫ్ సీజన్ ధాన్యంతో మిక్స్ చేసి చూపించే ప్రయత్నం జరిగిందా అన్న అనుమానాలు కూడా అధికారులు తెరపైకి తెచ్చారు. ఈ ఆరోపణలు వెలుగులోకి రావడంతో మిల్లుపై నమ్మకం పూర్తిగా దెబ్బతిన్న పరిస్థితి నెలకొంది.
ఇదిలా ఉండగా, కామాక్షి రైస్ మిల్ ప్రారంభమై సంవత్సరం కూడా పూర్తవక ముందే ఇంత పెద్ద ఎత్తున అవినీతి ఆరోపణలు రావడం విశేషంగా మారింది. గత రబీ సీజన్లో ప్రభుత్వం నుంచి వందలాది టన్నుల ధాన్యాన్ని సేకరించి, వాటిని ప్రస్తుత ఖరీఫ్ సీజన్లోని నిల్వలతో మిక్స్ చేసి అధికారులు చూసేలా చూపించారన్న అనుమానాలు వ్యక్తమవుతున్నాయి. రైతుల ధాన్యంపై ఇలా దందా జరుగుతుండటంతో బాధితులు ఆగ్రహం వ్యక్తం చేస్తూ, ప్రభుత్వం వెంటనే దర్యాప్తు చేసి బాధ్యులపై చర్యలు తీసుకోవాలని డిమాండ్ చేస్తున్నారు.
